गझल 

जीवनाची बासरी केलीस तू
वेदनेची शायरी केलीस तू

भूक माझी शमविण्या आई अता
पत्थराची भाकरी केलीस तू

झेलुनी या शेकडो जखमास या
वेदनाही हासरी केलीस तू

आज सारे उमगण्या ब्रम्हांड हे
अनुभवांची डायरी केलीस तू

रातंदिन बा... राबुनी शेतामधे
ढेकळाची बाजरी केलीस तू

पोचण्या अन गाठण्या ध्येयास हो
संकटांची पायरी केलीस तू

भोगतांना कोवळ्या देहास रे
वासनाही लाजरी केलीस तू

- प्रवीण बाबूलाल हटकर