भुगोल
ब्रह्मांडाचा अभ्यास
माया मायनं मायाच
चड्डीच्या भोकाले
ठिगळं लावता लावता शिकविला व्हता …
हा सूर्य हा चंद्र हे तारे
अशा अदभूत पद्धतीने
वेगवेगळ्या आकारा सह
डोयाले पुसत पुसत तिनं
मले भुगोलाचा तास गिरविला व्हता …
अर्थशास्र …
शेतीसाठी 'बा'नं काढलेलं
सावकारी कर्ज दरवर्षी फेडूनसुद्धा
कस वाढत जात
हे कुठलं कर्जाच शास्र
जे अजुनी माझ्या डोक्यावरून जात …
विज्ञान शास्र
जेव्हा नैसर्गिक सह कृत्रिम पावसाच्या
आशा मावळल्या
तेव्हा माझ्या बा सह आधुनिक तंत्र यंत्र कसदार जमिनीवर
वाट पहात बसले होते हात जोडून दैवी कृपा होण्याची
गणित शास्र
दरवर्षी प्रमाणे यदाही व्यापार्याला मातिमोल
किमतित विकलेल्या मालाचे
एकाएक गगनाला टेकलेले भाव
कसे वाढलेत
याचे गणित 'बा'ले अजूनही सुटलेले नाही
इतिहास …
शेतीसह धुरा वाचविण्या
बा सह पिढ्यान पिढ्या लटकून
घेतलेलं ते झाड
अजूनही उभे आहे साक्ष देत इतिहासाची
कदाचित वाट पहात माझी …
मानस शास्र…
माझ्या बा ले लटकलेल बघून
मायचं संतुलन बिघडलेलं पाहून
डॉक्टररानं गंभीर होऊन बोलले
मानसिक ताण देऊ नका …
सध्या पागलखाण्यात भरती करा …
समाज शास्र…
नात्य गोत्यासह समाजातील
हरेक घटका पुढे पसरवलेला
वयात आलेल्या बहिणीने मदतीचा पदर
रिकामाच राहिला
तेव्हा
मदत सोडून नजरेत कसे आले समाजाच्या
फाटक्यातील नग्न अंग डोळ्यात वासना येयीपर्यंत …
नागरिक शास्र…
ज्या वयात मतदान करण्याचा
साधा हक्कही नव्हता
त्या वयात कर्जाच डोंगर
व गहाण पडलेल्या घराच
घरपण वाचविण्याच नागरिकत्व वारसा हक्कात मिळालं ….
जीवन शास्र …
बा… मले सांगा हेच का ते
मरतावकती सांगलेलं
तीळ तीळ होऊन
जीव जीवासाठी
जीवन जगण्याच जीवनशास्र ….
हेच का ते बा... सांग ना ।।
-प्रवीण बाबूलाल हटकर
