जीवनशास्र …

 भुगोल

ब्रह्मांडाचा अभ्यास

माया मायनं  मायाच 

चड्डीच्या भोकाले 

ठिगळं  लावता लावता शिकविला व्हता … 

हा सूर्य हा चंद्र हे तारे 

 अशा अदभूत पद्धतीने
वेगवेगळ्या आकारा सह 

डोयाले पुसत  पुसत तिनं 

मले भुगोलाचा तास गिरविला व्हता … 

अर्थशास्र … 

शेतीसाठी 'बा'नं काढलेलं 

सावकारी कर्ज दरवर्षी फेडूनसुद्धा  

कस वाढत जात  

हे कुठलं कर्जाच शास्र 

जे अजुनी माझ्या डोक्यावरून जात …

विज्ञान शास्र
जेव्हा नैसर्गिक सह कृत्रिम पावसाच्या
आशा मावळल्या
तेव्हा माझ्या बा सह आधुनिक तंत्र यंत्र कसदार जमिनीवर
वाट पहात बसले होते हात जोडून दैवी कृपा होण्याची

इतिहास … 

शेतीसह धुर्यास वाचविण्या 

बा सह पिढ्यान पिढ्या लटकून
घेतलेलं ते झाड
अजूनही उभे आहे साक्ष देत इतिहासाची
 कदाचित वाट  पहात माझी …

मानस शास्र…
माझ्या बा ले लटकलेल बघून
मायचं संतुलन बिघडलेलं पाहून
डॉक्टररानं गंभीर होऊन बोलले
मानसिक ताण देऊ नका …
सध्या पागलखाण्यात भरती करा …

समाज शास्र…
नात्य गोत्यासह समाजातील
हरेक घटका पुढे पसरवलेला
वयात आलेल्या बहिणीने  मदतीचा पदर
रिकामाच राहिला
तेव्हा
मदत सोडून नजरेत कसे आले समाजाच्या
फाटक्यातील नग्न अंग डोळ्यात वासना येयीपर्यंत …

नागरिक शास्र…
ज्या वयात मतदान करण्याचा
साधा हक्कही नव्हता
त्या वयात कर्जाच डोंगर
व गहाण पडलेल्या घराच
घरपण वाचविण्याच नागरिकत्व मिळालं  ….

जीवन शास्र …
बा… मले सांगा हेच का ते
मरतावकती सांगलेलं
तीळ तीळ होऊन
जीव जीवासाठी
जीवन जगण्याच जीवनशास्र …. 

-प्रवीण बाबूलाल हटकर